上星期我地又去澳門，不過今次真係hea遊，因為陰陰天的關係，原本想去滑草，睇大熊貓館，但原來係星期一休館。所以主要都係食，食，食，同埋飲。唔緊要啦，其他的下次好天再去啦，聽到幾個朋友話去澳門好悶，點解會同小朋友去澳門!? 其實真係唔係呀，澳門有我喜歡的朋友，而且只要一家人在一起去什麼地方都是快樂的，做什麼於我倒是沒什麼所謂。

講返今次我地唯一去了嘅親子遊玩地方，就係燒灰爐兒童公園，聽講佢係澳門係非常之受歡迎的兒童遊樂場之一，公園除咗有戶外遊樂場的遊戲設施外，亦設有兒童電動車場，適合3至6歲兒童。

兩個去到都仲未知有正野玩，因為當日係星期一基本上都唔算人多，到我地去問工作的姐姐，比錢姐姐拎D電動車出來，佢地先知有好野玩，之後好心急想坐上去呢。

園內設計好像真實街道地上的線條，而且仲有紅綠燈，不過唔知係唔係壞咗要維修保養呢。

當日就唔見佢有開，不過本身都已經好好玩，2個都玩我好開心，每節15Mins，都只係MOP$5，兩兄弟玩咗30Mins都唔想走呢……最後職員比佢地玩多2個圈，玩完兩個仲話下次又要來澳門玩車……哈哈~

地點：燒灰爐兒童公園

地址：澳門半島公園街12號

開放時間：燒灰爐兒童公園 – 6am – 11pm

                    兒童電動車場 - 8am - 8 am

入場費：燒灰爐兒童公園 - 免費

                兒童電動車場 - 每15 mins MOP $5

我地玩完電動車，就走咗上主教山睇風景，之後行返落去澳門西望洋山北面的廣場嘅亞婆井前地，經過嘅亞婆井斜巷，真係隨便拍都好有味道，跟住行埋去鄭家大屋睇下，欣賞下古老嶺南風格建築大宅院。

之後慢慢遊走，一路行一路隨意食下唔到嘅地道美食，行返去議事亭前地，沿路有好多歐式建築，用來取境真係一流。

話明今次係hea遊，好多時間都係留係酒店，不過唔係去遊戲室玩，而係飲飲食食，check in個時，職員叫我地join呢個MOP $600的package，包2位大人自助早餐Buffet (6:30-10:30am)，而2兄弟未夠6歲所以自助早餐都係免費嘅，個package仲包埋2位成人Happy Hour任飲的 (5:30-8:00pm)，另外仲有2位成人的 High Tea set (2:30-5:00pm)，都係啦兩位小朋友未夠6歲Happy Hour都係任飲嘅，佢地發達，飲咗好多西瓜汁...LOL。

而Tea Set就係fix嘅，無得加，不過佢會提供水比小朋友飲，但係2個到第日的tea time都太累，zZZz。

返到香港收到月結單，呢個package就為返港幣HK$671左右，不過都算抵，因為酒店的自助早餐食物真係唔錯，而且好多野揀。

當然如果你係飲得之人，任飲嘅Happy Hour就梗係抵啦，佢有哂Cocktail 同Mocktail，啤酒，連列酒都有。我當然係飲小小Cocktail，加Mocktail，同埋飲下茶啦，輕輕鬆鬆一家人坐底休息下，hea下。而且好像7-8pm係有live band的，感覺都唔錯架~

如果大家都係比較喜愛親近大自然嘅，唔想困係一個又一個的遊戲室內，不妨睇下澳門自然網，入面有好多唔同的活動介紹的呀~ https://nature.iam.gov.mo/c/default