去大阪絕對要去USJ環球影城一趟，因為環球影城絕對適合一家大細。佢有可愛嘅童趣天地「環球奇境」(ユニバーサル・ワンダーランド)，仲有適合大人玩嘅刺激機動遊戲「飛天翼龍」過山車，睇見都覺得腳仔軟呀!!

而Day 4嘅第一篇，會針對介紹「環球奇境」，呢到有芝麻街、Hello Kitty、Snoopy。而我哋亦喺呢到逗留咗大半天，因為太好玩，玩到唔捨得走!!

第二篇將會介紹媽媽最愛嘅Sailormoon、Harry Potter以及紀念品店同埋去USJ嘅攻略。

[ 環球影城地圖 ]

USJ真係好大，每個園區都域分得好好，入場前必讀。

地圖下載→ http://www.usj.co.jp/hk/common/studiomap_jpg.html

從網上購票，泊好車從停車場步行去USJ正門大概10-15分鐘路程。

▲ 超級有心機，停車場沿路都有用水畫嘅卡通人物圖案

網上購票，出示手機收到嘅QR Code就可以輕易入場。

▲ 如果即場購票嘅話，排隊人龍超級長

一入場馬上去到「環球奇境」，絕對絕對係小朋友最愛嘅區域。

[ Hello Kitty 時尚大道 ]

和牛媽媽同和牛B都係Kitty Fans，所以嚟到呢到關於Hello Kitty嘅館同埋遊戲我哋都全部玩晒!!

仲經常見到Hello Kitty & Daniel同大家影相留念。

Hello Kitty夢幻蛋糕杯 – 呢個遊戲同旋轉咖啡杯原理一樣。本身會轉，自己仲可以扭動中間嘅轉盤再自轉。

不過，我同和牛B都略嫌轉得唔夠快(笑)。

Hello Kitty蝴蝶結大收藏 – Kitty 迷必定要嚟!!! 

呢到一場前，職員會詢問你個名，一入場嘅時候，職員會用咪，再次宣佈你係今日嘅VIP - (姓名)，一入到去就見到好多Kitty 嘅時裝展品。

仲有一條超特別嘅高跟鞋滑梯，第一次見高跟鞋滑梯呢~~

然後，再往前走有超多款式嘅蝴蝶結展品。

終於，嚟到最、最、最興奮嘅時候!! 入場前，職員又再核實一次VIP嘅姓名。登! 登! 登! 登! 著到好粉紅靚靚嘅Hello Kitty喺VIP房入面等梗我哋呀!!

佢仲識講嘢o架(日文)~~超級開心，和牛B一見到Hello Kitty，二話不說就已經伸開雙手準備同Kitty嚟個擁抱。

除咗可以同Kitty抱抱之外，仲有互動嘅時刻。

一齊影相留念。

歡樂時光過得特別快，等大會攝影師影好幾張相之後，就要同Kitty講再見啦!! 
離開房間之後，當然就係去賣相嘅地方放低啲錢，買返啲靚相啦~

我哋揀左3張相嘅套餐(2,800円)，相片封套都超級靚!! 有一個Hello Kitty舞台設計!!抵呀!!

買完相一轉身，仲超近距離見到Dear Daniel添呀~~~

▲ 超級近距離見到Daniel呀!!!

▲ Hello Kitty嘅紀念品店，不過個人覺得商品唔多，太少了。

[ 芝麻街歡樂世界 ]

芝麻街歡樂世界係「環球奇境」園區入面佔最大範圍嘅，如果鍾意芝麻街嘅你，一定會逗留好耐。

首先我哋去咗Elmo小兜風，小朋友只要滿3-6歲身高達90cm或以上就可以進入享受自駕樂趣~

▲ 和牛B超開心，同好朋友一人一架車兜兜風~

仲玩咗Moppy熱氣球之旅，熱氣球會升上半空，中間嘅轉盤仲可以令到熱氣球籃自轉。

呢個係USJ指定攝影位置，會有專人幫遊客影相同埋曬相服務。

▲ 我哋又點會錯過咗呢個大會影相嘅服務丫~而相嘅價錢都好公道。

Big Bird的大頂篷馬戲團即係旋轉木馬呀~入面嘅公仔全部變晒做芝麻街嘅人物。

▲ Big Bird的大頂篷馬戲團

而我會稱以下為芝麻街嘅Playhouse，因為入面有波波池、兒童遊樂設施等。

想避暑嘅話，可以入去玩一下。

▲ 有數張櫈俾遊客休息，仲可以停泊BB車。

有Bert和Ernie的奇幻深海滑梯波波池，不過人流比較多，同埋我見到係著鞋玩波波池，所以我哋都冇入到去玩。

仲有Elmo泡泡傲遊，係坐船仔嘅小遊戲。不過排隊人龍超長，當日我哋唔記得一早拎Fast pass，結果截咗人龍冇得玩呀。

▲ 遊戲超吸引，最後仲會有一次衝落水。但好可惜，玩唔到…

Moppy的幸運舞會 呢到可以睇住電視屏幕有Moppy嘅MV播放，小朋友都聞歌起舞。

Big Bird的巨巢 超放電嘅遊樂設施，一個大嘅半球繩網陣。

[ 史努比電影工作室 ]

史努比電影工作室係「環球奇境」園區佔第二大範圍。有室外遊戲亦都有室內遊戲，仲有室內過山車添!!

飛天史努比等於香港迪士尼樂園嘅小飛象，排隊玩嘅人都超多，最後我哋都放棄啦。
因為要等1.5小時，想玩記得拎Fast pass呀。

▲ 小童身高需92cm或以上先可以乘座

史努比雲霄飛車大競賽 室內過山車，小朋友只要身高達92cm就可以玩啦~

記得先去呢到拎Fast Pass呀~

仲有Mini Game「打棒球」。

▲ 望住屏幕顯示棒球位置，然後揮棒。

▲ 和牛B超勁，打咗個全壘打 (哈)

玩完遊戲，仲有張心意咭送~

館入面有唔少影相位~

仲有故事場景嘅學校

黑板上仲有教大家點畫查理布朗(Charlie Brown)。

一個呼風喚雨嘅遊戲~小朋友可以喺控制「打雷」、「落雨」、「閃電」。

環球奇境園區入面只有史努比影城咖啡廳，可以坐低食一餐豐富午餐。另外有一間Hello Kitty轉角咖啡室，主要係買小食同外賣嘅。

小朋友一人一份兒童餐，有一塊pancake、薯條麥樂雞同埋橙汁。

而我哋就點咗份肉醬意粉同薯條套餐。

另外，再買咗個Snoppy造型嘅奶皇包。

Part I就介紹到呢到先，下一篇就到大人嘅世界啦~~美少女戰士Sailormoon，仲有入園攻略!! 

今次係第二次一齊去旅行，兩個小朋友溝通多咗，有吵鬧又有好溫韾嘅時候。