專題
【親子國內旅行】廣洲番禺長隆動物園 - 餵長頸鹿 x 近距離睇野生動物
上篇都有提及今次旅行主要係去野生動物園，所以我哋兩日一夜嘅行程都係圍繞住動物園同埋酒店嘅。帶住小朋友，每一個景點都會逗留得比較耐，所以兩日一夜係剛剛好呀。
我哋當日搭7:45am船，落船過關、落車到達酒店大概11am左右。因為太早房間未有得Check in，所以先登記同埋旅存咗行李。再喺酒店食少少嘢，食完大概1pm就喺熊貓酒店對面馬路乘搭免費接駁巴士(單層)去動物園啦，車程大概5分鐘到就會到達動物園(南門)。
嚟到動物園，當然要同出面嘅裝飾品影下相留念啦。
而進入動物園之前，都需要先進行安檢再入場。佢哋係嚴禁遊客帶未開嘅食物同埋水入場，如果發現就要去安檢旁有個食物寄存地方擺低食物，先可以入場。
再次附上動物園地圖一張，每個園區都有唔少動物睇。如果只得幾個鐘喺動物園玩，就一定會走馬看花了!
入到場第一眼你就會見到一堆孔雀，旁邊仲有火烈鳥。
從右邊上就會去到雪狼谷，但係我哋去到雪狼谷就只有好多隻棕熊，完全無雪狼嘅蹤影。
不過唔緊要啦，我都係第一次咁近距離睇棕熊，超近呀！！隔住塊玻璃咋！！
再行就會見到非洲森林區，見到唔同品種嘅黑猩猩大哥們。
^ 黑腥腥大哥喺到拉梗筋!!! 真係好似人一樣呀!!
^大腥腥就喺到嘆梗世界
空中纜車
空中纜車分咗兩個站，「天鵝湖線」或「環原線」遊覽動物園一圈。如果想慳啲腳骨力，係可以坐到中途站「天鵝湖站」落車，然後再轉搭「小火車」遊覽非洲草原區近距離睇動物。
*孕婦唔可以乘搭空中纜車
^ 空中纜車路線圖
空中纜車車身設計為動物紋，另設有玻璃底車廂。
如果持有長隆/ 長隆熊貓酒店房卡嘅遊客，可以行「快速通道」，真係慳返唔少排隊時間呀!
因為我哋行「快速通道」所以都唔洗1分鐘就可以登上空中纜車了。不過空中纜車一吊車可以坐8個人，所以都要同其他人同一吊車坐。
從高空睇到火車區入面嘅動物園區，大象特然間變得好緲小呀!!
和牛B一啲都唔驚，仲好開心添呀!!
空中纜車我哋兩日入園都有坐，第一日我哋只搭半程，即係「天鵝湖線」落車，再轉乘小火車睇動物。(落左纜車行去車站嘅距離好近)
車站其實都設有「快速通道」，不過連續兩日職員都係叫我哋行返正常通道，可能因為唔算太多人，所以唔需要特登咁分兩條路吧。
外型好似架火車嘅車，我哋都叫佢做小火車。
入到Safari Park入面，如果動物走埋嚟都真係好近o架!! 如果本身有大陸車牌嘅話，可以自駕入場，如果無又想鍾意停低喺車到影下相，都可以搭的士入嚟呢個園區慢慢欣賞。
和牛B超鍾意動物，所以佢都好開心好期待。
入到去其實再細分咗唔同嘅區，會見到鹿、羊、駱駝、草泥馬、犀牛、獅子、老虎、大象、長頸鹿等等。
去到園區最後，可以超近距離見到長頸鹿，和牛B就特別開心同興奮!!
離開小火車，去到其他園區一樣好多嘢睇。「Coco六毛之家」入面嘅動物都仲係小BB嚟，真係好可愛呀!
BB時期嘅棕熊同黑熊係一齊相處o架，到大啲就會分返開養。
另外仲有兩個唔同品種嘅BB猴子，超活潑，兩個性格亦都好唔同。
白虎區都一樣精彩，每隔半小時就會有白虎表演跳水!!
又係隔住塊玻璃就見到咁大隻嘅白虎!! 白虎仲濕身上陣，所以圍觀嘅遊客真係超多呀!!
為咗舊生肉、生雞脾，白虎可以去到幾盡?? 爬樹、跳水乜都齊…
而對面仲有金錢豹，對我嚟講就係豹，但原來豹都有分好多種，真係唔講唔知呀!
第一次餵長頸鹿
今個旅程最期待嘅行程之一，餵長頸鹿。買咗飼料，就要企個好位引長頸鹿過嚟食嘢了。
幾經辛苦，終於引到長頸鹿過嚟了。
成功餵咗一次，超開心呀!
長頸鹿飼料每束RMB30。
樹熊館，中國譯名為卡拉，相信係取其英文發音Koala吧。
樹熊好活潑呀，有戶外區同埋室內展區，而長隆動物園入面都有好多隻樹熊。
亞洲象，同樣可以餵大象，不過需要少少加，將飼料拋過去俾大象食。
旁邊仲有「大象傳奇」嘅介紹，動物園嘅職員會為大家介紹大象嘅嘢，同遊客有互動，例如叫大家估下相片下呢隻大象到底有幾多噸重，又會叫大象示範點樣食南瓜等。
嚟到國內一定要探下國寶熊貓，嚟到熊貓樂園，都有唔少影相位o架。
熊貓走動地方好大，有室內區亦有戶外區。
長隆野生動物園，除咗好多動物睇之外，園區設計都能夠令動物同遊客好接近。
而與動物最接近最零距離嘅，就絕對係唔同區域嘅「科普站」，就好似蜘蛛猴咁，喺無任何圍欄之下，佢哋就喺樹、同樹上面嘅繩網陣都自己玩。而職員亦會再旁介紹動物，講解一下。
第一次餵彌猴
彌猴嘅走動空間超大，彌猴數量都好多，當日唔見過都唔知原來猴子係識游水!!
小手嘅力唔夠大，所以只能將飼料掉咗喺水入面。
飼料每份RMB10，入面係一啲餅仔嚟。
呢隻彌猴一定係老大嚟，我將粒餅對準佢掟過去，佢坐定定望實張開口，直接就食咗了~
NICE CATCH!!!
超鍾意睇猴子嘅和牛B，忍唔住要拎部相機出嚟影低。
而野生動物園入面，仲有一個「金猴王國」。
沿途仲可以近距離睇到大咀鳥、金剛鸚鵡。
仲有和牛B最鍾意嘅川金絲猴，數量比香港海洋公園多。
同樣都有戶外區、室內區。戶外區的距離就較遠，而室內的就只係相隔一塊玻璃，超近呀!!
呢個展館入面嘅嘢都好珍貴、好特別，一定要入去參觀呀!!
一入門口就有一隻會發叫、會郁嘅大猩猩。
珍貴嘅事物就係，我眼前嘅BB金剛鸚鵡。你見過BB鸚鵡未? 我就真係未見過了，毛都未出齊，眼都未開。再行仲會見到動物嘅手術室、X-Ray儀器等。
金剛鸚鵡BB
琉璃金剛鸚鵡BB
和牛B第一次見到箭豬，佢對箭豬一啲認識都冇，所以經過今次之後，佢又再認識多咗一樣嘢。
精品店，每個大嘅園區總會連接住一間精品店。當你準備離開動物園，仲有一間最大款式最齊嘅精品店。
毛公仔實在超多，差唔多動物園見過嘅動物，呢到都有得買。
BB車租借服務
帶寶旅行，除咗會拖喼之外，BB車你又會唔會帶呢? 今次去動物園我哋就無帶BB車，因為唔想每到一個景點又抱起又放低，所以我哋係行下、抱下。
如果真係好需要BB車而又無帶的話，動物園係有BB車租借服務嘅。
BB車租金為RMB100，按金RMB200; 而租借輪椅租金為RMB50，按金RMB200。
長隆野生動物園嘅動物，都係圍繞住陸地、天空嘅動物為主。園區都比較大，如果帶住小朋友以及老人家，玩2日係剛剛好。園內都有唔少餐廳食店，所以想填肚或買飲品補充的話絕對不成問題。唯獨是我覺得廁所唔算好多，而育嬰設備我就發現唔到，所以如果需要換片係比較辛苦少少。
下一篇，我哋會再為大家分享長隆熊貓酒店嘅房間、設施等。
廣州長隆野生動物世界
地址：廣東廣州番禺區長隆旅游度假區
--------------------------------------------------
歡迎聯絡我&和牛B: [email protected]
Facebook專頁: 和牛B嘅成長專頁
--------------------------------------------------
姊妹合作**Precious M accessories**
利用剩餘、過期的母乳，自己動手做屬於自己的首飾，母乳媽媽給自己的小獎勵，做法簡單自己都做得到。
其他專題
人氣專題
專題標籤
