自從和牛B 兩歲後唔再驚沙，佢就好鍾意去沙灘玩沙。不過，我哋搬咗出市區後，要去沙灘就好唔方便。因為地點通常都遠，其次就係去沙灘準備嘅嘢好多，要帶泳衣、沙灘玩具套裝、沖身用品、毛巾等。諗起都覺得好重、好多。所以都大大減低咗，假日想帶和牛B去沙灘玩嘅念頭。

^背住無敵大海景玩沙，重點玩沙工具都係餐廳免費提供。乜都唔洗帶、唔洗洗。

今次我介紹呢間親子餐廳，完完全全幫我解決咗去沙灘玩嘅煩惱。餐廳位於珀麗灣，呢到可以遠離市區嘅煩囂，讓我可以放鬆心情，享受假日嘅小島風情。

重點就係可以好輕鬆，兩手揈揈咁帶住和牛B去沙灘玩沙，同時又可以享用美味嘅午餐。

餐廳旁邊就係沙灘，家長可以睇住小朋友喺沙灘玩沙，同時享受美食。

坐在窗旁，可以欣賞景色，餐廳亦有室外用餐區。

玩沙之前，當然就係要食飽先啦~

用餐前，餐廳仲設有圖書閣，可以俾小朋友免費閱讀圖書。

最開心係，呢到都有和牛B最愛嘅Peppa Pig圖書。

除了圖書，亦有提供填色紙及顏色筆，小朋友絕對唔會覺得悶。

仲有魔術帽借，等和牛爸爸扮魔術師變啲把戲出嚟啦~

而食物方面，選擇都好多，至於兒童餐就有兩款。

兒童餐嘅餐具仲好精美，餐具係加拿大兒童餐具品牌Marcus & Marcus，餐具以食用級嘅矽膠製作，不含BPA成份。矽膠為耐用嘅物料，可耐熱220度嘅高溫，所以適用於日常煮食時使用，更可放入雪櫃、冰箱、洗碗機等。安全之餘，仲好可愛，仲有唔同顏色 (顏色係隨機嘅)。

和牛B食嘅係「Cafe Roma x Marcus & Marcus Amusing Kids Set 兒童套餐」- Penne Set 長通粉餐 ($88)。套餐包括：是日餐湯、主菜、新鮮雜果及果汁，主菜分別有意大利番茄長通粉。

和牛B見到兒童餐嘅食物，已經開心到由心到笑出嚟。

有大大碗新鮮雜果，亦有超足料嘅是日餐湯，今日係雜菜湯。

我哋揀選了蘋果汁，而餐廳採用環保飲管。

另外，一款兒童餐係迷你薄餅餐($88)。

薄餅係薄批，脆卜卜，和牛B食得幾滋味~就連小手指上面嘅汁都唔放過。

和牛B心口前嘅飯衣，亦係由餐廳提供。都係 Marcus & Marcus 嘅產品，呢到嘅配備都好貼心、完善，有飯衣提供亦方便到我。

食物方面，食材新鮮之餘，亦無添加味精。

而大人食嘅菜式，當然仲更加好味同豐富啦~

我同和牛爸爸最愛香口嘢，香脆雞條伴蜜糖芥末醬($88)亦係我哋首選，新鮮炸起脆卜卜嘅鮮嫩雞肉，唔會好硬好鞋口，再配上蜜糖芥末醬，真心好味!!

作為芝士控嘅我，焗法國軟芝士配白松露油、迷迭香及松子 ($128) 係我必食之選。芝士唔係好咸，再配上烘到脆卜卜嘅麵包，好似食梗厚芝士多士咁!! 超~~超~~好味呀!!

食咗兩味香口嘅頭盤，食返個新鮮凱撒沙律 ($118) 中和一下先~~食西餐我都必定會選嘅沙律~

主菜黑松露卡邦尼闊條麵($148)，配上咸香嘅巴馬火腿、意式煙燻煙肉、煙燻火腿、巴馬臣芝士、羊奶硬芝士、黑胡椒及黑松露忌廉汁，味道超香濃。

香烤美國黑毛豬扒 ($208)，第一眼係咪以為係羊架嚟呢，佢其實係美國黑毛豬扒嚟~肉質口感都好適中。配上雜菜，唔會覺得好膩。

食西餐，又點少得食薄餅呢，呢款係意國風情薄餅 ($148)，脆卜卜嘅薄餅皮。食材有巴馬火腿、火箭菜、水牛芝士及車厘茄。

最後，來到甜品我哋呢款係心太軟朱古力蛋糕配Mövenpick楓糖合桃雪糕 ($88)，朱古力唔係用牛奶朱古力，唔會好甜，亦唔苦，配上Mövenpick楓糖合桃雪糕 真係一絕。

和牛B都食得好滋味，仲連碟上面嘅朱古力都要舐埋。

用餐後，和牛B開始去玩沙。餐廳崇尚芬蘭人嘅文化，共享玩具。讓客人可以兩手揈揈咁嚟到沙灘玩沙，唔需要煩惱去玩沙要帶好多裝備配件。

重點餐廳員工Uncle Kevin真係超nice、好有童心，見到愈來愈多小朋友玩，仲拎多啲小法寶出嚟俾小朋友玩~

玩沙嘅工具、組合亦超多。基本上放喺呢到嘅，都可以免費玩。

仲有幼兒滑梯

我哋主張俾和牛B多體驗，親親大自然。(*餐廳亦有提供沙灘蓆，如有需要可以向職員查詢)

非洲鼓，享受音樂嘅熱情。

亦有男孩、女孩都愛玩嘅車車。

仲有吹泡泡嘅工具

珀麗灣呢個地方，對和牛一家嚟講，其實好浪漫。6年前和牛爸爸就係喺珀麗灣，對住無敵海景同和牛媽媽求婚。所以我哋間唔中都會再嚟珀麗灣玩下，浪漫一下。

而Cafe Roma餐廳座位唔算好多，建議先預先訂位(電話：3446 1226) 再前往。

前往方法：

[ 渡輪 ]

珀麗灣 <-> 中環2號碼頭 (班次)

珀麗灣 <-> 荃灣碼頭

[ 巴士 ]

1.珀麗灣 <-> 港鐵青衣站 NR330，登車位置近青衣站C出口 【詳細資料】
2.馬灣 <-> 港鐵荃灣站NR331，登車位置往綠楊坊，於荃灣巴士總站 【詳細資料】
3.馬灣 <-> 港鐵荃灣西站NR331S，登車位置近如心廣場【詳細資料】

4.珀麗灣 <-> 葵芳新都會廣場NR332，登車位置近商場戲院出口 【詳細資料】沙灘廣場站落車*
5.珀麗灣 <-> 機場2號客運大樓NR334，登車位置國泰城機場二號客運大樓【詳細資料】沙灘廣場站落車*

［官方］珀麗灣交通方法：http://www.pitcl.com.hk/tc/

【Cafe Roma@珀麗灣】

地址：香港珀麗灣沙灘商場地下 7-8 號舖 (馬灣東灣泳灘右側)

電話：(852) 3446 1226

電郵：[email protected]

網址：www.caferoma.com.hk

Facebook：www.facebook.com/caferoma.hk

Instagram：www.instagram.com/caferomahk

<Marcus & Marcus>