難得平日放假，梗係去啲假日去會超多人嘅地方啦！
一諗就諗起長洲，仲記得上次入去淨係等船都排晒長龍，好似過關咁，好誇張！
入到去四處都人頭湧湧，想嘆下街頭小食，但一見到條人龍就嚇到放棄咗喇！
今次一定要食番上次食唔到嘅嘢呀！
寒冷天氣警告之下，的確係有一刻動搖過入長洲嘅決心！腦海一閃，不如搵個商場睇番場戲冇咁凍冰冰喎！但真係冇乜幾可平日放假，所以最終都冇被魔鬼誘惑得到。按原定計劃上船去~
響碼頭等待上船嘅乘客十分疏落，上到船自然大把位啦！好正呀！唔駛等又唔駛迫嘅感覺實在太好喇！
落船後第一檔幫襯嘅就係大大粒魚蛋，在低溫之下新鮮炸起出晒煙，咁凍嘆熱辣辣嘅魚蛋份外美味！而且唔駛加醬汁，原汁原味已經好夠味！食完兩串唔夠喉，仲要再加碼！食飽飽~ 暖笠笠~
突然落起雨來，企咗一陣都未停雨，越落越大，應該要搵個地方避下雨喇！
行下行下，就行咗去長洲體育館，應該可以入去坐低休息一陣兼避雨啦！
晴晴一入到去就話要除鞋，原來發現咗個好地方呀！*o*
嘩！兒童遊戲室！重點係冇人，大玩特玩囉喂！~
牆上有多塊益智遊戲板，又係考智力同耐性嘅時候喇！
女仔係特別鍾意照鏡㗎啦！晴晴都唔例外~ XD
騎上唔同動物嘅感覺係點嘅呢？不如逐隻試下囉！
明明係一隻蟹仔嚟！晴晴將佢調轉咗就話好似一支大牙刷喎！果然創意無限~ XD
嚟到長洲，當然要學下玩風帆啦！咦...吔....好大風浪呀！少啲平衡力都唔得！
穿上蛙鞋，準備去潛水囉！gogogo~
對潛水未係好夠信心嘅話，可以穿上大水泡，學下游水先啦！
游游下又要過去同河馬玩，晴晴同所有動物都做咗好朋友喇！
點樣可以企上去又唔跌呢？努力學習中~ XD
不停爬上去又瀡番落嚟！係咪咁樣玩㗎？好似係畀bb玩嘅似啲喎！
坐車車跟住車道滑落，爽呀！
玩完之後又推番車仔回起點，來來回回，都計唔到玩咗幾多次喇！
突然又話要行平衡木，但係咁闊好似完全冇難度喎！
既然係咁，一於將難度升級，衝過晒所有障礙就完成！Yeah!!!
兒童遊戲室係由兩個壁球室改建而成，玩飽一個後，梗係要玩埋隔離果個啦！
嘩嘩嘩！呢個好似仲啱玩喎！衝呀！~
晴晴好快就黐咗埋牆度，為嘅就係搶包山喇！哈哈！由右攀至左，成個過程就好似緊張刺激嘅搶包山比賽咁呀！
攀爬成功！雖然一個平安包都冇攞到，但係滿足感爆晒燈！
接住落嚟就要玩下呢個遊樂場喇！有邊個小朋友見到會唔心動㗎？*o*
遊樂場頂部仲整咗少少具長洲特色嘅東西，好有風味~
事不宜遲！馬上展開捐癃捐隙、摛來摛去四處探索之旅~
最後，從滑梯一瀡而下，玩得好hyper！瀡滑梯簡宜係小朋友至愛呀！玩到出晒汗喇！
呢兩個轉轉就好似洗車屋果啲大海綿咁，晴晴攝咗埋去就變咗部車，去洗白白囉！XD
洗完白白記得跳埋飛機喎！123456..7~ 完成！
玩咗成個鐘，出面啲雨都停咗喇！我哋係時候又四出搵食囉！^o^
周圍行到凍冰冰，想搵間餐廳食午餐暖下個胃，最終被呢間日本料理嘅sabu sabu吸引咗入去~
估唔到啲嘢食又整得唔錯喎！可以同巿區啲日本餐廳比美。我哋唔客氣喇！(右下角幅相攝自晴晴^^''')
食飽之後，繼續四圍行下啦！行到去呢個掛滿鎖頭同心心嘅圍欄，覺得好靚呀！so sweet~
嘩！大大串薯片！想食佢好耐喇！仲有唔同味道嘅調味粉畀你自助加，我最鍾意係辣粉，勁加狂加喪加~ XD
係時候去搵番啲甜品食下喇！平時響巿區食過好多次掛名「長洲芒果糯米滋」，入到嚟長洲，一定要試地道嘅！
晴晴一咬落去見到大大件芒果就開心到咁嘅樣，好搞笑！除咗芒果之外，我仲買咗兩件榴槤味獨享。正忠長洲糯米滋好似好味過巿區果啲，唔知係咪心理作用呢？XD
穿越長洲嘅大街小巷，四圍行下影下相，咁先似係旅遊加嘛！^^
長洲有不少店舖售賣handmade工藝品，手工精緻，整得好靚！齋睇唔買都已經好開心啦！
回程嘅時候遇著坐慢船，唔想吹風所以揀咗豪華位，令我回憶起中學時代同一大班同學入長洲玩，坐豪華位玩啤牌嘅時光。而家再入嚟已經係帶住小朋友，時間真係過得好快呀！好回味~
今次又凍又落雨，加上係平日，所以入長洲真係冇咩人。
食咩都唔駛排隊，想食嘅就即買即食，爽到秘呀！
仲畀我哋巧遇長洲體育館嘅兒童遊戲室添！
雖然地方唔算大，但已經足夠避雨嘅時候畀晴晴玩樂喇！
搶包山同滑浪風帆果part真係好有長洲特色。
大家如果同小朋友入開長洲，記得要到兒童遊戲室玩玩。
呢度簡直係小朋友入長洲嘅新蒲點呀！
精華片段：
兒童遊戲室@長洲體育館
地址：長洲醫院路三號
電話：2981 6285
開放時間：
早上7時50分至8時40分
早上8時50分至9時40分
早上9時50分至10時40分
早上10時50分至11時40分
早上11時50分至下午12時40分
下午1時50分至2時40分
下午2時50分至3時40分
下午3時50分至4時40分
下午4時50分至5時40分
下午5時50分至晚上6時40分
晚上6時50分至7時40分
晚上7時50分至8時40分
晚上8時50分至9時40分
FIND US on:
BLOGs:
CONTACT US:
