+
專題 小JM愛玩樂。玩轉粉嶺。【食。玩在聯和墟半天遊】
發佈傑。斯與晴 2019/03/20 252

每星期我地最期待就緊係爸爸放假啦!

因為爸爸放假我地就可以去遠啲玩,而且媽媽都可以稍為輕鬆一啲。
 
前陣子聽到朋友提起粉嶺開咗一間新嘅Playhouse,細查之後,發現原來就係粉嶺聯和墟附近。
 
講起「粉嶺聯和墟」,剛好令我回想起當時半供讀嘅日子,雖然忙碌,但卻過得充實自在。
距離最後一次到訪聯和墟都已經有十年八年之久,
所以今天藉著假期決定帶爸爸同小JM到聯和墟來個「半天遊」!
 
聯和墟嘅面貌雖然有唔少轉變,但慶幸好多特式小店依然尤在,真係令人好懷念。
事不而遲,即刻睇下「食玩在聯和。半天遊」有咩好玩好食啦!
 
食在聯和
既然帶得爸爸同小JM來,就緊係要試下「那些年」媽媽嘅最愛啦!
 
剛好我地到達時係朝早,當然就要揾早餐食啦!
想食早餐唔一定要食茶記,其實仲可以有其他選擇架!
 
1.) 四眼仔腸粉
以前返工時我就會買腸粉做早餐,夠晒平靚正呀嘛!
 
而家嘅四眼仔腸粉都已經搬咗鋪,由從前嘅轉角小鋪搬咗去前一個街口嘅鋪頭。
店面比舊鋪更大,但價錢依舊親民。

難得來到,當然要來個All-In啦!
你睇何其壯觀!

 淨係食腸粉燒賣唔夠?
唔緊要,不妨試埋對面間老字號!

2.) 協香麵飽西餅
協香係聯和墟嘅老牌餅店之一,返工買早餐之選。

協香仲有啲特式麵包,其中以  雞膇包 同 菠蘿包最為出名架!
雞膇包都係必食之一,我地去到個陣剛好有新鮮出爐雞膇包,當然要買返個來懷念一下。
而呢度嘅菠蘿包出名在真係有菠蘿架,不妨一試喔。

^啖啖肉嘅雞膇包,都只係八蚊咋!
 
店內仲有好多特食包點,你都來發掘一下啦!

^班蘭蛋糕耶!
 
3.) 爵士拉麵
以前想食都真係要約同事Mark實日子先可以食到,皆因休假日不定。
但而家店鋪已經轉由老板女兒負責,休假日早早定咗,就減少落空嘅機會。
 
我地點咗叉燒拉麵及肥牛拉麵。
拉麵比較有咬勁,湯底比印象中清啲,無咁濃味。

  
玩在聯和
既然食飽,又係時候出發玩下、放下電啦!
來到聯和墟又點少得去「聯和市集」兜個圈呢!
 
1.) 聯和市場
地點:粉嶺聯和墟和豐街46~48號

除咗係電影《每當變幻時》嘅拍攝埸景之外,其實仲好有歷史價值,所以一直被保留。
以前未做電影場景時,外牆都甚為殘舊,但經過修葺活化後聯和市集得以保存。

^菜市場,貼有「聯和手作村」字樣。

^魚市場,而家已經變咗做回收中心啦!

 

呢度有老舊嘅牆身,可以當作背景;亦可借荒草做襯托。
 
2.) 粉嶺聖若瑟堂
地點:粉嶺聯和墟和泰街5號

可惜今趟行程遇上聖若瑟堂正維修,有點無緣。
 
3.) 前粉嶺裁判法院
地點:新界粉嶺馬會道302號
 
經復修及活化後,前粉嶺裁判法院將變為香港青年協會領袖學院。
但就保留咗原有建築特色,包括法庭及拘留室原貌添架。
希望3月尾打後再有機會帶小JM去參觀啦!
 
以前半供讀時到過嘅「粉嶺戲院」早已被拆卸,而家亦變成工地。真係令人概嘆。
 
4.) Kids Park
地點:粉嶺綠悠軒商場二樓12-13號舖 
VIDEO:
 
 
為咗慰勞一下小JM今日早起陪媽媽一齊去「想當年」,我地決定俾小JM去放電!
剛好係綠悠軒就已經有間新開嘅Playhouse,仲要呢個商場有埋扭蛋鋪同好多唔同嘅車車坐添,
好動嘅小JM又點會放過呢個機會呢!
 
Kids Park佔地面積約3000平方呎,設有多個不同遊戲區,飛機造型嘅波波池區、彈床區、互動投射遊戲區、攀石區及適合小B玩嘅幼兒專區添架。
 

沿商場電梯直上就已經會見到 Kids Park 嘅入口,從入口處望向去會見到一座飛機造型嘅波波池玩樂區。
小JM見到波波池就已經自動自覺除鞋準備入去玩啦。
 
溫馨提示:
1.) 基於個人衛生問題,記得要著襪喔。
2.) 有唔舒服就唔好去玩,要多啲休息。
3.) 保持場內整潔。
3.) 記得要擺好鞋仔。
3.) 記得進場前先清潔雙手。
 
事不宜遲,即刻睇下場入嘅區域好玩之處啦!
飛機造型波波池區

場內最為吸引小JM嘅區域之一,莫過於飛機造型波波池區。
呢個大型波波池專區仲有兩條滑梯,分別係三滑道滑梯及旋轉管道滑梯。

 

^三滑道滑梯
可以同時俾三位小朋友一齊滑下,當日爸爸同小JM都有一齊玩添。
速度感不錯,一滑而下就衝入波波海中!

^旋轉管道滑梯,旁邊就係攀石牆區
旋轉管道滑梯嘅速度更快更為刺激,小JM一玩再玩,仲笑唔停添!

唔單止咁,係飛機造型嘅波波池區內仲設有繩網秋韆,

可以俾小朋友坐係上面盪來盪去之餘仲可以踢下波波添!

^繩網秋韆
 
係飛機造型遊樂架內亦設有多種不同障礙通道,想要玩滑梯?
咁就要先考下你嘅身手及耐力啦!

^圓拱梯級

^繩網隧道

^七彩吊橋

^越野障礙物
 
係飛機造型波波池區內仲有有條小通條,入面仲有平衝道可以俾小朋友玩架!
你又發唔發現到呢?

 互動投射遊戲區

係波波池嘅另一邊設有互動投射遊戲區,可以考下小朋友嘅眼界、準成度及體力!
而且互動投射遊戲仲設有多款不同遊戲選項添架!
打喪屍又得,打地鼠都得!得咗!
 
彈床區

玩完波波池仲有電力嘅,不妨到旁邊嘅彈床區繼續彈下跳下放下電。
你睇,大細JM都放量晒電啦!
呢度嘅彈床區地方夠大,有充足空間俾小朋友隨意跳動!
 
幼兒專區

除咗啱大B嘅玩嘅區域之外,呢度仲設有幼兒玩樂專區。

^小型波波池
呢個區域有多種不同玩樂設備俾小朋友們玩,同時設有一個小型波波池俾細B們玩樂,的確貼心喔。

係小型波波池旁邊仲一座滑梯及秋韆架。
而且架的側邊仲有籃球架,可以俾小B玩投籃喔!

係秋韆架後方位置就有一系統嘅廚房、售賣店等玩具,
可以俾小朋友玩煮飯仔及學習買賣。
 
唔單止咁,係幼兒玩樂專區嘅另一邊仲設有積木區及搖搖馬區添架!

︿積木區

︿搖搖馬區
 
玩完一大輪小JM都已經放夠電,一上車都已經即時昏睡。
睇來呢個半天遊除咗可以滿足我嘅口腹之外,仲可以幫小JM放量晒啲電添!
還好爸爸放假,如果唔係要我抱住返屋企就大件事架啦!哈哈
 
最後補返張收費表俾大家做參考:

收費: (*已包括一名成人陪同一位兒童)
星期一至五:
60分鐘/HKD$40
2小時/HKD$60
全日票HKD/$90
額外加一名陪同成人HKD$30
 
特別日子: (公眾假期除外)
60分鐘/HKD$50
2小時/HKD$80
全日票/HKD$120
額外加一名陪同成人HKD$40
 
星期六、日及公眾假期:
60分鐘/HKD$70
2小時/HKD$100
全日票/HKD$150
額外加一名陪同成人HKD$40
 
黃昏時段優惠:
星期一至五:六點後入場至八點 HKD$40
星期六/日及公眾假期:六點後入場至八點 HKD$70

剛好而家做緊優惠,平日只需要HKD$40添咋!

博客名稱 傑。斯與晴
簡介 前Playgroup導師新手在職媽媽,喜歡以文字作紀錄 細數與小JM生活中既點滴動人時光及成長經歷與體驗 喜歡分享育兒逸事、幼兒食譜、親子旅行及遊玩資訊 以及回顧媽咪懷孕以來既種種經歷與點滴
內容更正
當前活動:
更正內容:
驗證碼: