專題
【餐廳介紹】社企餐廳，有Heart的＜籽樂廚房＞，學埋手語「聾健共融」
社企餐廳你哋去過未?
其實我今次都係第一次去社企餐廳，因為香港嘅社企餐廳實在太少。
咁點解咁有意義嘅餐廳，點解會少? 原因其實都不外乎，香港租金實在太貴。
今次帶住和牛B嚟到，體會更深。我亦係第一次真正接觸弱聽/聾人，而我哋仲跟佢哋學咗啲手語添呀。
地點位於尖沙咀，新建嘅大廈。
餐廳入面環境好舒適，每張台之間一啲都唔迫，亦唔會感到壓迫感。
而餐廳亦將廚房變成玻璃窗，客人可以睇到廚師再廚房煮食。
而餐廳仲不採用微波爐解凍或翻熱，對於食物嘅健康，我信心的確大增!
餐廳入面有唔少勵志嘅海報。
嚟到呢到食個早晚飯，所以人流唔多。
呢到除咗有Set Dinner之外，仲有一個好特別嘅套餐「情聚無聲」套餐 ($198)，你可以與弱聽/聾嘅職員學習手語，再以手語點單。
店員非常樂意教導，如果學唔到佢會教到你識為止。
所以學完，和牛爸爸都馬上利用手語進行點單，成功無點錯~
「情聚無聲」套餐，有一個湯、蒜蓉包、意粉、餐飲。
香脆蒜蓉包，唔會好咸好油
南瓜忌廉湯
鮮蝦、雞柳蕃茄醬汁寬條麵
凍檸茶
有特別嘅「情聚無聲」套餐，餐廳仲有親子純素兒童餐($128)，
全素嘅兒童餐，睇落好似好普通，其實全部都係健康食材。
又點解一個個小碗裝住呢? 係因為食物需要由家長及小朋友一齊製作，先可以開始食~
平時都會同和牛B一齊落下廚，整昏單嘅食物。今次來到餐廳，當然難唔到我哋啦~
家長要嘗試放手，小朋友先有機會發揮同訓練佢嘅手、眼協調。
成功完成咗其中一樣食物，粟米枝豆脆筒。
非常簡單，芝士紫菜卷。和牛B超鍾意食，秒速食完~
安全嘅兒童刀，放心俾和牛B自己使用。
食飽飽之後，就去餐廳嘅Kids Corner到遊玩一下。
呢到有兒童圖書免費閱讀，仲有一啲環保材料玩具。
進入Kids Corner前，記得留意守則哦。
餐廳入面除咗Kids Corner之外，其實仲有戶外遊戲區。
不過，因為戶外遊戲區只開放到4:30pm。
唔係主流嘅餐廳，佢哋係一間共融嘅餐廳，食物質素都有。
餐廳入面亦充滿住愛，希望大家都會去支持一下。
【籽樂廚房 Sowergift Kitchen】
地址：九龍尖沙咀山林道38號「銀座38」3樓
電話：2668 0450
營業時間：12:00 - 10:30pm
--------------------------------------------------
歡迎聯絡我&和牛B: [email protected]
Facebook專頁: 和牛B嘅成長專頁
--------------------------------------------------
姊妹合作**Precious M accessories**
利用剩餘、過期的母乳，自己動手做屬於自己的首飾，母乳媽媽給自己的小獎勵，做法簡單自己都做得到。
其他專題
人氣專題
專題標籤
